الرسالة الثالة : املء قلبك بالحب

حب كل حاجة حوليك خلي قلبك مليان بطاقة الحب , هتقولي ازاي اعمل كدة والدنيا والحاجات الى حاولينا مخليانا مش طايقين بعض

 ولا طايقين نفسنا حتى ؟؟؟؟؟

هقولك لو كل واحد بص جوه نفسه هيلاقي في حتة ضغيرة كدة مستخبية وعاوزة تطلع , هتلاقي حب كبير في قلبك لربنا بدليل انك لما بتعمل حاجة غلط بتستغفر على طول بشكل تلقائي احنا بقى عاوزين نطلع الحتة الصغيرة دي في حب ربنا للنور لانها هتكون الاساس الى هيطلع من جواك كل اشكال الحب التانية 

خد من وقتك خمس دقايق وقت الفجر اول ما تصحى وادعي ربنا اي دعاء انت عاوزه ,كلمه باي شكل انت ترتاح فيه حتى لو هتقوله بس صباح الخير يا رب ,ايوة زي ما بقولك كدة , لو مش عندك وقت ومش بتصحى وقت الفجر خد خمس دقايق في اي وقت استغفر فيها ربنا , او احمده واشكره على اي نعمة ادهالك , قوله انك بتحبه قوي بالرغم من كل الاخطاء الى بتعملها وانك اد ايه طمعان في كرمه ومغفرته , كل دا لو عملته كل يوم بس خمس دقائق هتلاقي قلبك اتغير وهتحس بحساس مختلف تماما, وهتلاقي نفسك كل يوم بتدور على الخمس دقائق دول علشان تروح تكلم ربنا وتقوله الى انت عاوزه ومرة في مرة هتلاقي الخمس دقايق دول زادوا , لان الكلام مع ربنا مريح جدا للنفس مش هتلاقي فيه خداع ولا محتاج تنافقه ولا محتاج تخبي عليه حاجة لانه عارف كل حاجة عنك 

فبتتكلم معاه وانت مرتاح جدا ومتاكد انه مش ممكن يستغلك كلامك او يفهمك غلط 

حاول .... جرب  .... واقولنا عملت ايه

...........دمتم في سعادة

الرسالة الثانية : مفاتيح السعادة

طبعا لكل واحد مننا مفاتيح مختلفة للسعادة وهي عبارة عن الحاجات الى لو عملها هيكون سعيد , وعلشان كدة انا هحاول اني اعرفكوا على بعض مفاتيح السعادة ودي طبعا من وجهة نظري انا , لانها حاجات فعلا مجرد التفكير فيها بشكل ايجابي واني اقدر أعملها بتخليني احس بجزء من السعادة 

من غير ما اطول عليكوا هقولكوا على اول مفتاح للسعادة وهو الحب , ايوة الحب بكل اشكاله , الحب الى من غير مصلحة ,زي حب ربنا ودا اسمى حب ممكن تحس بيه وتعيشه , حب الوالدين , حب الاخوات , حب الاهل , حب الجيران , حب الاصدقاء , حب الزوج لزوجته وحب الزوجة لزوجها .

تاني مفتاح للسعادة هو فعل الخير اين كان حتى لو كان حاجة بسيطة وصغيرة 

تالث مفتاح للسعادة هو ايمانك بقدراتك وامكانياتك وانك تقدر تعمل الى انت عاوزه  مهما كان راي الناس فيه طالما بتلاقي فيه سعادتك 

رابع مفتاح للسعادة هو وجود هدف عايش علشانه وتعيش بيه تصحى بيه وتنام بيه يكون هو اساس تفكيرك وهو المسيطر عليه ودا هيخليك تدور على الطرق المختلفة للوصول للهدف دا 

 خامس مفتاح للسعادة هو الابتسامة الدائمة مهما واجهتك المشاكل والضغوط 

سادس مفتاح للسعادة هو الدعاء في كل وقت وفي اي مكان 

دي هي مفاتيحي للسعادة واكيد عندكوا مفاتيح تانية كتير خلونا نشارك بعض في المفاتيح دي يمكن تكون سبب في اسعاد واحد من الناس وبكدة تكون اسعدت نفسك وغيرك 

في الرسائل القادمة ان شاء الله هتكلم عن كل مفتاح من مفاتيح السعادة دي وهحاول اوضح اثرت فيا ازاي , وازاي هنلاقي السعادة فيها 

 .......دمتم في سعادة 

  

جرعة سعادة

سلام عليكم 

النهاردة كلامي مش هعتبره رسالة انما هو طريقة اعتقد ممكن توصلنا لمعرفة الحاجة الى بتسعدنا , الطريقة دي بسيطة وسهلة جدا وهي انك يا سيدي تجيب ورقة وقلم واكتب اي حاجة حلوة تخطر في بالك مثلا نوع اكل بتحبه , او شخص نفسك نشوفه, او اغنية عاوز تسمعها اي حاجة ممكن تحس بيها بالسعادة افضل اكتب لحد ماتلاقي نفسك بتضحك وانت بتكتب, ساعتها بس وقف كتابه وبص للحاجات الى كتبتها واتعرف عليها كويس وحاول تعمل جاجة من الحاجات دي على طول يعني مثلا لو كتبت اغنية كنت بتسمعها من زمان وبتحبها شغالها على طول دلوقتي واسمعها وهكذا.... طبعا ناس كتير هتقول ايه الكلام الفارغ دا هو احنا فاضين لكدة ؟ هقول لحضرتك ان الموضوع دا مش هياخد غير دقايق بسيطة منك بس هتغير مودك طول اليوم كله حاول بس وجرب وقولنا هل الطريقة دي نجحت معاك ولا لا

.........دمتم في سعادة 

الرسالة الاولى : السعادة

 :سلام عليكم

 في البداية احب اعرف كل الى بيقرا المدونة عن الهدف منها, وهو نشر السعادة بين الناس ,وطبعا السعادة دي شيء ممكن تلقيه في كل حاجة حلوة حوليك , ولان الايام الى بتعدي على كتير مننا اغلبها بتكون صعبة ,فاصبحنا مش لقين السعادة في اي حاجة وبقت حاجة تكاد تكون مستحيلة نظرا طبعا لظروف الحياة وضغوطها الى كلنا بنمر فيها

علشان كدة حبيت اني اعمل المدونة دي علشان كلنا نشارك بعض فيها ونحاول على اد ما نقدر ندور على السعادة دي جوانا او حولينا في اي مكان واي وقت المهم اننا يكون عندنا الهدف والاصرار اننا تلاقيها, صدقوني مجرد ما تشعر بالسعادة دي كل حاجة هتتغير في حياتكوا , ليه منجربش ونشوف هل الموضوع هينفع فعلا ولا لا ؟ هل احسسنا بالحياة هيتغير ؟هل نظرتنا لبكرة هتتغير ؟ يا ريت  كل الى هيشوف رسالتي الاولى يشاركني رايه ويقولي هو شايف السعادة ازاي وفي ايه

.......دمتم في سعادة